Lingua

O martes 3 de febreiro o Pazo de Fonseca de Santiago de Compostela acolleu o acto de presentación de "Polo deporte galego en galego", un manifesto promovido pola Fundación Azkar e a Universidade de Santiago de Compostela e apoiado por numerosos/as deportistas, clubs, entidades e persoeiros/as a nivel individual.

Entre outros, no acto de presentación e sinatura do manifesto, de compromiso de uso da lingua galega nas actividades deportivas, participaron deportistas como Ezequiel Mosquera (Xacobeo), Manu Barral (Lobelle Santiago), a iudoca Sara Álvarez ou a ciclista Eva Castro; representantes de distintas entidades e clubs como Marta Souto (directora xeral para o Deporte), Elía Torres (vicerreitor da USC), Terio Carrera (xefe de Deportes da Radio Galega), Ignacio Eguíbar (xerente da SA do Plan Xacobeo), Manuel Vázquez (presidente do Azkar Lugo), Pilar Neira (adestradora da selección nacional feminina de fútbol), representantes de federacións ou agrupacións de taekwondo, tiro con arco, deportes extremos, halterofilia, etc., e outros persoeiros como Carlos Blanco ou Jorge Mira.

A CTNL, presente no acto, tamén apoiou o manifesto.

MANIFESTO POLO DEPORTE GALEGO EN GALEGO

As persoas que aquí estamos cremos nos valores que o deporte nos ofrece, amamos o deporte como actividade de superación e mellora constante, de responsabilidade e de dedicación.

Cremos no deporte como lugar de encontro e fraternidade.

Iso é o que entendemos que é a nosa lingua: o espazo onde melloramos e onde nos encontramos, o vínculo referencial e colectivo de todas as galegas e todos os galegos; a nosa maneira de estar no mundo e estender a todo ese mundo unha mensaxe de respecto e fraternidade.

Hoxe abrimos este Foro do Deporte Galego en Galego, impulsado pola Fundación Azkar e a Universidade de Santiago de Compostela a través da Vicerreitoría de Cultura, co compromiso de que a nosa lingua común sexa a nosa forma habitual de expresión, o galego que nos une.

Queremos contribuír co noso esforzo no deporte, practicándoo, contándoo, vivíndoo, a un futuro mellor, onde gocemos do noso grande patrimonio vivo, onde podamos contar o esforzo e a superación, o triunfo e os novos retos, vivindo en galego.

Desde este Foro que hoxe comeza a andar, queremos facer un chamamento a todas as persoas que entenden o noso idioma como parte de todas e todos nós, particularmente a todas e todos os deportistas, institucións, entidades e, en xeral, a todas as xentes do deporte, a unírense a este Foro e a desenvolver, na medida das súas posibilidades, accións individuais ou colectivas, que permitan avanzar nese obxectivo, desde a fraternidade dunha Galiza cada vez mellor e nunha sociedade máis xusta e máis humanizada, máis deportiva.