21-06-2008O Observatorio da Lingua Galega actualiza os datos sociolingüísticos do país en todos os ámbitos
A Secretaría Xeral de Política Lingüística (SXPL) presentou o Observatorio da Lingua Galega, unha iniciativa para coñecer a situación actual do galego na sociedade de xeito global e desde unha perspectiva tanto cualitativa como cuantitativa. No web deste Observatorio xa se fornecen datos de todos os sectores.
O Observatorio da Lingua Galega impulsado pola SXPL analiza oito grandes ámbitos da sociedade galega, consonte cos estabelecidos no Plan xeral de normalización: administracións públicas, educación, medios de comunicación, economía e empresa, sanidade, cidadanía, tecido asociativo e telecomunicacións. Facendo sucesivas observacións no tempo destes oito sectores preténdese facilitar unha medición e valoración do impacto das actuacións en materia de lingua.
Os primeiros datos dados a coñecer polo Observatorio son resultado dun traballo de análise cuantitativa baseada na realización de máis de 7.000 enquisas en diferentes ámbitos e dun traballo de análise cualitativo realizado a partir de 22 paneis de escoita.
Todos os datos poden consultarse no web deste Observatorio (
www.observatoriodalinguagalega.com), tanto mediante documentos con resumos das observacións por ámbitos como mediante estatísticas por ámbitos ou por variábeis ou por índices de normalización.