Lingua

O novo obxectivo da Ciberirmandade da Fala é Amnistía Internacional, a quen lle queren dar os parabéns polo traballo que levan desenvolvendo durante moitos anos ao tempo que lle piden que incorporen ao seu web versión en galego.

Amnistía Internacional acaba de celebrar os 30 anos da súa legalización no Estado español, e 20 de presenza continuada en Galiza. Por estes motivos, a Ciberirmandade quere sumarse cos parabéns evidentes polo aniversario e mais polo traballo feito, mais quere facelo tamén cunha suxestión que ten que ver coa pouca sensibilidade de AI a respecto das distintas linguas do Estado, que se plasma na falta de opción de galego, catalán e éuscaro no seu web, así como nas campañas de envío de correos electrónicos que lles remiten ás/aos socias/os e colaboradores.

Desde a Ciberirmandade consideran que unha organización como AI non debería de ter maior problema, nin polos valores e principios que defende, nin polos recursos que se lle supoñen, en satisfacer os dereitos lingüísticos das distintas comunidades do Estado español. Por todo isto, animan a enviarlles este correo de felicitación e suxestión.