URXENTE!: O Concello de Cangas convoca unha praza de TNL

O Concello de Cangas publicou o 11 de xullo de 2025 na súa sede electrónica a convocatoria dun proceso selectivo para contratar un/unha técnico/a de normalización lingüística. Tamén se prevé a formación dunha bolsa de emprego co mesmo perfil.

Características da praza

Trátase da contratación dun/dunha técnico/a de normalización lingüística como funcionario/a interino/a para a execución dun programa de caracter temporal ao abeiro das axudas para o mentemento, a creación e o reforzo de SNL da Deputación de Pontevedra. As funcións do posto están recollidas nas bases destas subvencións.

A praza convocada clasifícase na escala de Administración especial, subescala técnica, grupo A1, nivel 26, en réxime funcionarial, a xornada completa, con carácter temporal por un período de 2 anos deste dende a data do nomeamento, por execución de programas.

Requisitos de titulación

Grao en Lingua e Literatura Galegas, grao en Estudos de Galego e Español, grao en Galego e Portugués: Estudos Lingüísticos e Literarios, licenciaturas equivalentes a eses graos ou outras titulacións superiores pertencentes á área de Humanidades ou de Ciencias Xurídicas e Sociais, sempre que posúan tamén o certificado de lingua galega do nivel 5 (Celga 5).

Procedemento de selección

O sistema de selección será a oposición, que constará de dous exercicios:

• Primeiro exercicio: consistirá en contestar por escrito un cuestionario de 30 preguntas tipo test, con catro respostas alternativas, relacionadas co contido da parte xeral do temario do anexo II das bases. A cualificación máxima deste exercicio é de 10 puntos, sendo necesario acadar 5 puntos para superalo. O tempo máximo para realizar este exercicio son 60 minutos.
• Segundo exercicio: proba práctica onde se poñan de manifesto os coñecementos sobre as tarefas que se van desenvolver. O exercicio, obrigatorio e eliminatorio, será cualificado de 0 a 10 puntos, sendo necesario para superalo obter unha puntuación mínima de 5 puntos.

Presentación de solicitudes e prazo

O prazo para presentar solicitudes é de 5 días hábiles desde o seguinte á publicación da convocatoria na sede electrónica, é dicir, o prazo finaliza o 18 de xullo.

As persoas que desexen tomar parte do procedemento selectivo desta praza deben presentar:

1. Solicitude no modelo oficial do anexo I das bases
2. Fotocopia do DNI ou NIE
3. Fotocopia da documentación acreditativa da titulación esixida
4. Xustificante acreditativo do pagamento das taxas. Segundo o establecido na ordenanza fiscal municipal correspondente, a cantidade que se debe aboar é 25,56 €.