Que traballamos nun servizo de normalización lingüística, nun equipo dun centro de ensino ou nunha asociación para o fomento da lingua? Pois, para podermos intervir, planificar e desenvolver mellor as accións para o incremento do uso e prestixio do galego, podemos acudir ao Kit para a normalización lingüística.
Para antes de intervir ofrécenos unha completa bibliografía de referencia, a normativa legal a diferentes niveis e os datos sociolingüísticos que hai recollidos e analizados.
Para coñecermos experiencias e cousas que xa se fixeron, ofrécenos un decálogo de boas prácticas, no que se presentan e analizan múltiples accións desenvolvidas desde SNL, ENDL ou asociacións atendendo a criterios como eficiencia, impacto, visibilidade, innovación, etc.
Para poñernos a traballar, facilítanos facelo en rede, para o que nos achega datos e información sobre entidades nunha completa guía da lingua.
E para seguir sempre aprendendo, pois o kit compila materiais formaticos de cursos e xornadas, e facilítanos unha completa selección de recursos como dicionarios, léxicos, modelos de documentos ou webs de referencia.
E todo isto, sempre en dous niveis, un máis básico e outro máis avanzado.
Este kit non só é unha ferramenta imprescindible, senón que compila as diferentes ferramentas imprescindibles para facilitar o traballo en normalización lingüística.
Foi elaborado polo Centro de Documentación Sociolingüística de Galicia (CDSG) do Consello da Cultura Galega.
Témolo en http://kit.consellodacultura.gal/
Un “kit” coas ferramentas básicas para a normalización lingüística xuntas e ordenadas
Información básica para ter en conta antes de intervir, un decálogo de boas prácticas, información para traballar en rede ou materiais e información para a formación continua. Estas son algunhas das cousas que contén o actualizado “Kit para a normalización lingüística” que nos ofrece o Consello da Cultura Galega
