Un idioma preciso, de Xusto Rodríguez Río, agora tamén en libro
O proxecto dixital Un idioma preciso, coordinado por Xusto Rodríguez Río, agora ten tamén o seu irmán en papel, unha obra que reflexiona sobre a linguaxe utilizada na comunicación técnica e científica en forma de artigos sobre problemas de léxico habitual nos que se analizan conceptos de diferentes áreas de especialidade, sobre os que se fai unha reflexión sobre a conveniencia de uso e para os que se propoñen as solucións máis acaídas.
Un idioma preciso reflexiona sobre os procesos de creación de léxico na lingua galega e, singularmente, naqueles termos máis de voga en ámbitos e disciplinas científicas. Un libro que axuda a ver doutro xeito a comunicación e a lingua, a comprender como se crea e se move.
Esta obra é unha das que inaugura a recentemente estreada 2.0 editora.
Un idioma preciso
Autor: Xusto Rodríguez Río
ISBN: 978-84-936514-0-4
Páxinas: 298
2.0 editora. Colección folcsonomías. 2010
Prezo: 18 €
Xusto Rodríguez Río, até este ano secretario da Coordinadora de Traballadores/as de Normalización da Lingua (CTNL), é técnico do Servizo de Normalización Lingüística da Universidade de Santiago de Compostela e responsábel da Área de Terminoloxía. A versión dixital de Un idioma preciso, que el coordina e que xa vai pola entrada 137, foi finalista do premio ao autor do ano da Asociación Galega de Editores (AGE).
