Lingua

O pasado día 8 tivo lugar a presentación da campaña Avogamos polo galego no salón de actos do Colexio de Avogados de Santiago de Compostela. Neste acto interviñeron o decano do propio colexio, D. Evaristo Nogueira Pol, xunto coa secretaria xeral de Política Lingüística, D.ª María Sol López Martínez. Ambos os dous destacaron, principalmente, a importancia de contribuír á normalización do idioma no ámbito da avogacía e a necesidade de ofrecer os medios necesarios para poder acadar este reto.

O Gabinete de Normalización Lingüística do Concello de Vimianzo, dependente da Concellaría de Benestar Social, Promoción da Igualdade, Cultura, Deporte, Xuventude e Ensino, presentou publicamente un blog no que informará sobre as actividades que vai a desenvolver e sobre a lingua galega en xeral.

Coa idea de contribuír a animar os pais e as nais a transmitirenlle a lingua aos fillos desde que nacen, a Secretaría Xeral de Política Lingüística pon en marcha a iniciativa Encontros dos Axóuxeres para bebés en familia, que se desenvolve en distintas localidades de toda Galiza durante o mes de novembro.

A Deputación da Coruña asinou convenios para o financiamento de servizos de normalización lingüística de 43 concellos. A esta acción o organismo provincial destina este ano máis de 500.000 euros.

En setembro entrou en vigor a Lei 13/2007, do 27 de xullo, de modificación da Lei 4/1988, do 26 de maio, da función pública de Galicia.