Somos Xogo, unha iniciativa de Xandobela para divulgar o patrimonio lúdico galego

Xandobela. Educación e Cultura presentou esta semana o programa Somos Xogo, unha iniciativa que busca promover e divulgar do patrimonio lúdico galego e a creatividade xogantina. Nesta campaña desenvólvense varias accións:

1. CONCURSO “XOGA EN GALEGO”

Trátase dun certame de creación de xogos de mesa en galego para público infantil e familiar, cos seguintes obxectivos:

a) Dinamizar o uso da lingua galega entre o colectivo infantil e familiar en contextos educativos e sociais diversos.

b) Potenciar a creación lúdica colectiva.

c) Impulsar procesos e actividades de dinamización lingüística relacionados directamente co xogo para o colectivo infantil e familiar en contextos e tempos de lecer dun xeito participativo.

No certame poden participar persoas ou grupos da provincia da Coruña, que deberán presentar unha memoria explicativa do xogo ou xogos con que concorran. O prazo para participar está aberto até as 23:59 horas do 28 de febreiro de 2021.



Logo no web de Somos Xogo colgaranse todos os xogos que concorran no concurso. Disporemos así dun repositorio de xogos descargables e imprimibles en galego, para seren xogados por calquera persoa.

Máis información e bases aquí.

2. ESCOLA DE XOGAR

A segunda acción consiste nunha campaña de dinamización social e escolar de difusión do patrimonio lúdico galego, cun catálogo de dúas actividades para desenvolver nas escolas, asociacións e concellos interesados:

– Xoguetoloxía co que che caia nas mans (de 4 a 8 anos)

– Xoguetoloxía sen nada nas mans (de 8 a 12 anos)

Máis información aquí.

3. FEIRA XOGANTINA

A terceira acción é a elaboración dun repositorio e escaparate de entidades, iniciativas e recursos lúdicos galegos: asociacións e colectivos, artesanía, deseño de xogos, tendas, ludotecas itinerantes… e outras iniciativas e experiencias relacionados co xogo e o patrimonio lúdico.

Coa feira, de momento virtual, Xandobela busca dar mostra da diversidade, riqueza e heteroxeneidade das propostas existentes arredor do xogo e do patrimonio lúdico, polo que teñen cabida iniciativas e experiencias de asociacións e outros colectivos, artesanía, deseño de xogos, tendas… Pódese participar na feira xogantina escribindo a info@xandobela.info.

Máis información aquí.

O proxecto Somos Xogo está subvencionado pola Deputación Provincial da Coruña a través da convocatoria de produción de proxectos singulares de especial interese cultural na provincia (ano 2020).