O Conseyu de la Mocedá d ‘Asturies e a Xunta pola Defensa de la Llingua Asturiana, en colaboración con outras entidades, organizan estas I Xornaes Mocedá y Llingües minorizaes, nas que participan representantes de Asturies, Galiza, Euskadi e Illes Balears.
As xornadas desenvolveranse o venres 8 e o sábado 9 de maio, no Auditorio Príncipe Felipe de Uviéu.
O primeiro día, ás 11.30 h, intervirán Asier Amondo, da Coordinadora d ‘Euskaldunización e Alfabetización (AEK, polas súas siglas en ‘euskera’), Xosé Antón González Riaño, da Academia de la Llingua Asturiana, e Marta Carrió, do Consell de Juventut Balears.
Todos eles falarán sobre os ‘Enfoques educativos de les llingües minorizaes’. Este mesmo día, pola tarde, terá lugar a manifestación pola oficialidade, coincidindo coa celebración do Día de les Lletres Asturianes, a partir das 19.00 h na Estación de Renfe.
Ao día seguinte, ás 10.00 h, David Forniés, do Centre Internacional Escarré per a les Minoríes Étnicas y Naciones (Ciemen) e Xurde Blanco Puente, presidente do Aconceyamientu de Xuristes pol Asturianu, para dar unha charla sobre as ferramentas de normalización no ámbito político e lingüístico.
Ás 12.00 h, coa mesma temática, será a quenda de Penélope Miranda, presidenta da Asociación de Trabayadores de Normalización Llingüística en Asturias, e Nancy Domínguez, responsábel do Servizo de Normalización Lingüística do Consello da Xuventude de Galicia.
Ás 17.00 h haberá unha mesa redonda de ‘Medios de Comunicación: oportunidaes y torgues pa la diversidá llingüística’ na que participarán Rhodri ap Dyfrig, do Mercator (Gales); Montse Besada Vergara, produtora do programa Xabarín Club, da Televisión de Galicia; Beatriz Redondo Viado, directora do semanario Les Noticies; Próspero Morán, director do portal de Internet Asturnews; e Fernando de la Fuente Trabanco, director do portal de internet Asturies.com.
Paralelamente, en diferentes municipios asturianos, organizaranse obradoiros de diversas técnicas de creación artística en relación coa lingua asturiana, como a elaboración de cómics, a maquillaxe ou a fotografía dixital. Tamén se fará un mural e xogarase un partido pola oficialidade, este último ás 17.00 h, no polideportivo de Pola de Laviana.
Máis información, aquí.
Representantes de Asturies, Balears, Euskadi e Galiza, nas I Xornaes Mocedá y Llingües Minorizaes en Uviéu
Representantes de asociacións e entidades que traballan pola normalización lingüística en varios territorios do Estado participan nas I Xornaes Mocedá y Llingües minorizaes, que teñen lugar o 8 e 9 de maio en Uviéu, Asturies.
