Ordenanza municipal de normalización lingüística do Concello de Gondomar
O Concello de Gondomar acaba de aprobar a súa Ordenanza municipal de normalización lingüística. Tras a fase de información pública e a resolución das alegacións presentadas, publicouse definitivamente no BOP de Pontevedra do 3 de febreiro de 2020.
O Boletín Oficial da Provincia de Pontevedra do 3 de febreiro de 2020 publicou a aprobación definitiva da Ordenanza municipal de normalización lingüística do Concello de Gondomar.
Este texto do Concello de Gondomar declara o galego como idioma oficial do Concello, por ser lingua propia de Galicia. Por tanto, establécese que “as actuacións administrativas realizaranse en galego no territorio municipal e terán plena validez e eficacia”.
Ao longo dos seus 32 artigos distribuídos en 12 capítulos, regúlase o uso oficial do idioma galego nas resolucións e na documentación administrativa; nas relacións coas e cos administrados; nas relacións institucionais; nos avisos, publicacións e actividades públicas; nos rexistros; na atención ao público; na toponimia, sinalizacións e rótulos e na selección, provisión e reciclaxe do persoal. Tamén se establece a responsabilidade do concello no impulso institucional do idioma e os mecanismos de cumprimento e seguimento da ordenanza.
O SERVIZO DE NORMALIZACIÓN LINGÜÍSTICA (SNL)
O texto da ordenanza recolle no seu artigo 2.4 que “o Concello de Gondomar mantén un Servizo de Normalización Lingüística co obxectivo de dar pulo á normalización do concello“. Aínda que non hai un artigo ou capítulo que se ocupe exclusivamente do SNL e recolla pormenorizadamente as súas funcións, si se mencionan ao longo do seu articulado as seguintes:
– establecerá criterios de uso lingüístico para a entidade (art. 2.4);
– responsabilizarase da corrección de textos que deban ser publicados (art. 16);
– formará parte dos tribunais de selección de persoal para valorar os coñecementos de galego (art. 25);
– determinará os perfís lingüísticos do persoal dos diferentes departamentos (art. 26);
– organizará cursos de lingua galega para o funcionariado (art. 27);
– formará parte da Comisión Interdepartamental de seguimento da ordenanza (art. 30.1);
– ocuparase das tarefas para dar pulo institucional á “normalización do uso do galego nas actividades mercantís, publicitarias, asociativas, culturais, deportivas e calquera outra dentro do ámbito municipal” (art. 32.1 e 2) e
– será o soporte técnico para un traballo transversal neste eido de todos os organismos do concello” (art. 32).
Ordenanza municipal de normalización lingüística do Concello de Gondomar, en .pdf
