O Concello de Carballo, a través do seu Servizo de Normalización Lingüística (SNL), organiza un obradoiro de nanas dirixido a nais e pais, presentes ou futuros, que queiran aprender ou practicar o aproveitamento do poder emocional das nanas e cantos de berce para arrolar os seus bebés e para comezar a transmitirlles o galego.
Este obradoiro terá catro horas de duración, e desenvolverase o martes 20 e o mércores 21 de decembro, en horario de 17.00 h a 19.00 h, no Pazo da Cultura de Carballo. Nel poden participar un máximo de 25 persoas, ben soas, ben acompañadas do seu bebé. A inscrición é gratuíta e pode facerse no Servizo de Normalización Lingüística (no Pazo da Cultura) ou no teléfono 981 704 304, en días laborábeis en horario de mañá.
Do obradoiro encargaranse Rosa Bugallo, licenciada en Filosofía e letrista, e Ugia Pedreira, unha das voces máis recoñecidas da canción galega actual, membro do grupo Nordestin@s e de Marful, a banda de referencia da nova música pop galega. Ambas as dúas pertencen á Central Folque.
No obradoiro, as nais e pais participantes achegaranse a dez nanas galegas cantadas por Ugia Pedreira, con explicación sociolóxica e práctica en grupo. Serán dez cantos de berce cos que se fará unha análise dos valores expostos, e das que se practicarán as melodías e as letras. Tratarase tamén o significado da voz e o seu poder emocional tanto no útero como nos primeiros anos de vida. Ao final do obradoiro, os pais e as nais compoñerán a súa propia canción de arrolo para comezar a transmitirlle o galego aos seus peques.
Obradoiro en Carballo para comezar a transmitir o galego co poder emocional das nanas
Para nais e pais, presentes ou futuros, soas ou sós, ou acompañados/as do seu bebé, que queiran comezar a transmitirlle o galego ao seu ou súa peque co poder emocional dos cantos de berce. Para isto, o SNL do Concello de Carballo organiza un obradoiro de nanas que terá lugar os días 20 e 21 de decembro
