O programa televisivo ‘Ben falado!’, agora en DVD

A Televisión de Galicia e a Secretaría Xeral de Política Lingüística acaban de editar unha antoloxía de 82 capítulos do programa Ben falado!, un microespazo divulgativo de cinco minutos diarios dedicados á lingua galega do que a TVG emitiu na súa canle principal arredor de 250 capítulos.

Na actualidade, desde o verán, a televisión pública galega retirou da súa grella este espazo, mais desde a SXPL e desde a TVG anuncian que haberá novos capítulos en 2010.

O DVD que se acaba de editar compila 82 dos arredor de 250 capítulos emitidos, e está á venda nas principais librarías galegas.

Ademais de estar á venda, a SXPL anunciou que “distribuirá exemplares nos centros educativos de Galicia e nos máis de corenta centros de estudos galegos de fóra da comunidade”. Por esta razón, desde a CTNL envióuselle unha carta á SXPL na que se sinala que “como ben sendo habitual, unha vez máis a SXPL «esquécese» para a distribución de materiais normalizadores dos arredor de 80 servizos de normalización lingüística que están activos no país, cando, lembrámoslle, unha das funcións principais da SXPL é «promover, impulsar e coordinar o labor de normalización lingüística dos servizos de normalización doutros organismos e administracións públicas» (Decreto 83/2009, do 21 de abril).”

Deste xeito, desde a CTNL “solicitámoslle que desde a SXPL se teñan en conta os servizos de normalización lingüística (de concellos, de universidades, doutros organismos, etc.) para a distribución de materiais e, neste caso en concreto, que se lles envíen aos SNL exemplares do DVD do programa televisivo Ben falado, igual que se lles envían aos centros de ensino ou aos centros de estudos de fóra da comunidade.”