O Consello da Cultura pide que non haxa pasos atrás no proceso de normalización lingüística e propón o desenvolvemento consensuado do Plan xeral de normalización da lingua galega

O Consello da Cultura Galega aprobou, na súa sesión plenaria do pasado día 17 de novembro de 2009, unha declaración institucional que, aínda que vai dirixida ao Parlamento galego, tamén fixo pública “para a súa consideración por parte do Parlamento de Galicia, da Xunta e da opinión pública”.

O documento foille entregado por parte do presidente do Consello da Cultura Galega á presidenta do Parlamento, foille remitido a todos os grupos parlamentarios e foi tamén presentado publicamente.

Nel solicítaselle ao Parlamento a constitución dunha comisión parlamentaria na que “oídas as institucións, colectivos e expertos […] elabore unha proposta de desenvolvemento consensuado do Plan xeral de normalización da lingua galega (PXNLG)”.

Mais, antes desta solicitude, a declaración aprobada foi un memorando no que se critica duramente, por exemplo, “a asociación entre o idioma galego e a imposición, dunha banda, e o idioma castelán e a liberdade, da outra”, asociación que se cualifica de “groseira falsificación da realidade que carece de toda base na historia, remota e recente, do noso país”.

Ademais, lémbraselle á Xunta que lle “corresponde exercer o liderado do proceso de recuperación e dignificación do idioma galego” e que a política lingüística debe apoiarse no “respecto ao conxunto da nosa lexislación lingüística”. Tamén se sinala que “en ningún caso se deben tomar medidas que supoñan pasos atrás no proceso de recuperación do galego como lingua propia de Galicia”.

Podes descargar aquí a declaración completa en .pdf.