Convocatoria dunha bolsa de emprego de técnico/a de normalización lingüística para os concellos da Baña e Negreira

O Concello da Baña publicou no BOP do 13 de abril de 2026 a convocatoria dun proceso selectivo para crear unha bolsa de contratación de técnico/a de normalización lingüística, que realizará as súas funcións nos concellos da Baña e Negreira.

Características da praza

Trátase de crear unha lista para a contratación dun/dunha técnico/a de normalización lingüística como persoal laboral temporal do grupo I para realizar funcións nos concellos da Baña e Negreira, ao abeiro das axudas para o mantemento, a creación e o reforzo de SNL da Deputación da Coruña.

A bolsa de emprego que se constitúa ao abeiro desta convocatoria terá vixencia ata o 31 de decembro de 2026, data ata a que se prevé a cobertura financeira da contratación mediante a subvención concedida pola Deputación da Coruña.

Requisitos de titulación

Grao en lingua galega, licenciatura en filoloxía galego-portuguesa, filoloxía galega ou filoloxía hispánica (subsección galego-portugués).

Procedemento de selección

O sistema de selección será o concurso-oposición. A oposición, que terá unha puntuación máxima de 60 puntos, constará de dous exercicios:

• Primeiro exercicio: consistirá en contestar por escrito un cuestionario de 60 preguntas tipo test e cinco máis de reserva, con catro respostas alternativas, relacionadas co contido do temario do anexo I das bases. A cualificación máxima deste exercicio é de 45 puntos e será necesario acadar 22,5 puntos para superalo. O tempo máximo para realizar este exercicio son 60 minutos.
• Segundo exercicio: contestar, de forma concisa e breve e durante o tempo máximo dunha hora, un caso práctico en relación coas materias contidas no temario que figura no anexo I das bases. O exercicio será cualificado cun máximo de 15 puntos.

A fase de concurso será previa á de oposición e terá un valor máximo de 40 puntos. Nel valoraranse os seguintes aspectos:

• Formación: valorarase cun máximo de 15 puntos.
• Experiencia laboral: valorarase cun máximo de 25 puntos.

Presentación de solicitudes e prazo

As solicitudes de participación seguirán o modelo que figura no anexo II das bases e deberán dirixirse á Alcaldía do Concello da Baña.

O prazo para presentar solicitudes é de 15 días hábiles desde o seguinte á publicación da convocatoria no BOP da Coruña.