O sábado 7 de marzo, Asemblea Xeral da CTNL

A CTNL convoca as súas socias e socios á Asemblea Xeral ordinaria de 2026, que terá lugar o sábado 7 de marzo, a partir das 10:00 da mañá no Espazo Apego de Compostela. Posteriormente celebrarase un xantar no restaurante O Dezaseis e pola tarde un paseo por Compostela guiado por Xosé Ramón López Boullón.

Asemblea anual da CTNL

A Coordinadora de Traballadores/as de Normalización da Lingua (CTNL) reúnese en Asemblea Xeral ordinaria o sábado 7 de marzo, ás 10.00 h en primeira convocatoria e ás 10.30 h en segunda, no Espazo Apego de Santiago de Compostela.

• Día: sábado 7 de marzo de 2026
• Hora: primeira convocatoria, ás 10.00 h; segunda convocatoria,ás 10.30 h
• Lugar: Espazo Apego (rúa República do Salvador, 12, 15701 Santiago de Compostela)

Orde do día

1. Lectura e aprobación da acta da asemblea anterior
2. Admisión de novas/os socias/os e ratificación de baixas
3. Exposición, debate e aprobación do informe de xestión
4. Exposición, debate e aprobación do informe de contas
5. Elección da nova Xunta Directiva
6. Exposición, debate e aprobación do plan de acción para o próximo exercicio
7. Presentación e aprobación do orzamento para o vindeiro exercicio
8. Rolda aberta de intervencións

Documentación para a asemblea

Para preparar mellor as achegas e propostas para debater na asemblea e así facermos entre todas e todos una asemblea máis áxil, dinámica, participativa e produtiva, unha semana antes poderedes consultar no web a documentación necesaria.

Antes diso, e tamén antes da asemblea, os/as socios/as podedes remitir ao enderezo info@ctnl.gal todas as ideas e propostas que teñades e que creades que a CTNL pode desenvolver, alén de presentardes propostas, suxestións e ideas na propia asemblea.

Elección da Xunta Directiva

Na Asemblea deste ano corresponde elixir unha nova Xunta Directiva. Segundo os estatutos da CTNL, a Xunta Directiva estará integrada por un/unha presidente/a, un/unha secretario/a, un/unha tesoureiro/a e seis vogais (art. 24) e os cargos da Xunta Directiva terán unha duración de dous anos (art. 25).

Deste xeito, poderedes presentar candidaturas á Xunta Directiva até 72 horas antes da Asemblea (até o mércores 4 de marzo, ás 10.00 h), para o que deberedes enviar a candidatura completa por correo electrónico a info@ctnl.gal; nela deberán figurar os nomes, apelidos e números de documentos de identidade dos/das socios/as que a compoñen, sempre contando co visto e prace desas persoas.

Xantar de confraternización lingüística

O mesmo día da Asemblea da CTNL teremos no restaurante O Dezaseis un xantar aberto de confraternidade lingüística, no cal pode participar calquera persoa interesada en compartir connosco unhas horas de conversa e boa comida.

• Lugar: casa de xantar O Dezaseis (rúa de San Pedro, 16, Compostela)

• Hora: 14.30 h

• Prezo: 33 euros

• Menú:

Entrantes:

• Lacón á feira con queixo Galmeán
• Ensalada con ventrecha de bonito
• Revolto de cogomelos e gulas

Segundo prato a escoller entre:

• Raia á galega
• Segredo de porco á grella con redución de viño Mencía

Sobremesa variada da casa

D.O. Ribeiro/D.O. Ribeira Sacra (dúas copas de viño por persoa)

Auga e café

Confirmación: agradecemos a confirmación de asistencia ao xantar e a indicación da escolla do segundo prato o máis axiña posible e, en todo caso, até o 2 de marzo, no enderezo info@ctnl.gal ou no teléfono 629571950.

Paseo guiado por Compostela

A partir das 16.30 da tarde remataremos a xornada da asemblea cun paseo por Compostela guiado por Xosé Ramón López Boullón.

Duración aproximada: 1 hora

Para participar nesta actividade non é necesaria inscrición.