Lista de contratación de técnico/a de normalización lingüística no Concello da Baña

O Concello da Baña publicou no BOP do 24 de xullo de 2025 a convocatoria dun proceso selectivo para crear unha bolsa de contratación de técnico/a de normalización lingüística.

Características da praza

Trátase de crear unha lista para a contratación dun/dunha técnico/a de normalización lingüística como persoal laboral temporal do grupo I para a execución dun programa de caracter temporal, A Baña en galego, ao abeiro das axudas para o mentemento, a creación e o reforzo de SNL da Deputación da Coruña. As funcións do posto están recollidas nas bases da convocatoria.

A bolsa de emprego que se constitúa ao abeiro desta convocatoria terá vixencia ata o 31 de decembro de 2025, data ata a que se prevé a cobertura financeira da contratación mediante a subvención concedida pola Deputación da Coruña.

Requisitos de titulación

Grao en lingua galega, licenciatura en filoloxía galego-portuguesa, filoloxía galega ou filoloxía hispánica (subsección galego-portugués).

Procedemento de selección

O sistema de selección será o concurso-oposición. A oposición constará de dous exercicios:

• Primeiro exercicio: consistirá en contestar por escrito un cuestionario de 100 preguntas tipo test, con tres respostas alternativas, relacionadas co contido do temario do anexo I das bases. A cualificación máxima deste exercicio é de 40 puntos e será necesario acadar 20 puntos para superalo. O tempo máximo para realizar este exercicio son 120 minutos.
• Segundo exercicio: desenvolver dous temas, un da parte xeral do temario e outro da parte específica. Cada un dos temas escollerase entre tres de cada parte do temario. O exercicio será cualificado de 0 a 20 puntos e será necesario para superalo obter unha puntuación mínima de 10 puntos. O tempo máximo para realizar este exercicio son 120 minutos.

O concurso terá un valor máximo de 40 puntos e nel valoraranse os seguintes aspectos:

• Formación: valorarase cun máximo de 16 puntos.
• Experiencia laboral: valorarase cun máximo de 24 puntos.

Presentación de solicitudes e prazo

As solicitudes de participación seguirán o modelo que figura nos anexos II e III das bases e deberán dirixirse á Alcaldía do Concello da Baña.

O prazo para presentar solicitudes é de 10 días hábiles desde o seguinte á publicación da convocatoria no BOP da Coruña, é dicir, do 28 de xullo ao 8 de agosto.