Como foi anunciado na anterior mobilización do 17 de novembro, a plataforma cidadá Queremos Galego convoca a percorrer as rúas de Compostela o domingo 23 de febreiro, Día de Rosalía.
Co lema Lingua vital xa! Paremos a emerxencia lingüística, a cidadanía galega está chamada a ateigar as rúas de Santiago de Compostela desde a Alameda ata a praza do Obradoiro, nunha manifestación que comezará ás 12.00 h. Nesta data sinalada, estamos chamados a transformar a emerxencia lingüística en forza reparadora, co exemplo e inspiración de Rosalía de Castro. Por outra parte, o lema escollido apela á Xeración Xabarín e recorda a icónica serie As bólas máxicas.
Queremos Galego é unha plataforma cidadá conformada por entidades de diferentes ámbitos e por persoas a título individual, que nace da vontade de articular unha ampla resposta colectiva a prol da lingua propia do noso pobo, o galego; de defensa e afirmación dos usos públicos e dereitos lingüísticos xa garantidos pola actual lexislación; de progresiva normalización naqueles espazos onde o idioma de noso non goza aínda da presenza desexada. A Coordinadora de Traballadores/as de Normalización Lingüística forma parte de Queremos Galego desde a súa constitución.
Nas últimas semanas, a plataforma convocou plenarios en cidades vilas e comarcas co fin de impulsar o traballo colectivo en prol da lingua.
Información máis detallada:
