Correlingua é a denominación que adoptaron de maneira común a partir de 2001 as diversas carreiras en prol do idioma que se convocaron no país. É unha proposta de carácter lúdico, educativo e reivindicativo que pretende convidar á mocidade e aos centros de ensino a participar nun acto público de reivindicación do dereito de medrar en galego e tamén a exercer de maneira efectiva como galegos e galegas a través do uso do noso idioma, única forma de garantir o seu futuro.
O Correlingua, que chega á súa décima edición, alcanzou ao longo destes anos unha alta participación dos centros de ensino e do alumnado, así como o apoio de persoeiros e organizacións de todo tipo.
O Correlingua está organizado pola AS-PG, a CIG-Ensino, a Mesa e os concellos de Lugo, Pontevedra, Santiago e Vigo, e conta coa colaboración de ducias de concellos máis e doutras moitas entidades.
Previamente ás carreiras fin de festa que teñen lugar agora, centos de centros de ensino implicáronse en diversas actividades preparativas e concursos, como a elaboración do manifesto, que fixo o IES Porta da Auga de Ribadeo, concurso de banda deseñada, de pancartas, etc.
Ademais, nesta edición houbo por vez primeira un concurso de música en galego, o Cantalingua, ao que se presentaron 38 temas. Os gañadores, que actuarán nos actos fin de festa de diversas carreiras, foron Machina, García MC e Kastomä.
Calendario completo do Correlingua 2010 >
Galego: a forza do noso amor. Comeza o Correlingua 2010
Entre o 3 e o 14 de maio, arredor de 45.000 rapazas e rapaces percorrerán as rúas de 14 vilas e cidades galegas na carreira lúdico educativa Correlingua. Logo de todas as actividades e concursos previos, chega a carreira final, con máis actividades, animación e actuacións de grupos como Chévere, Machina, García MC, Fantoches Baj ou Pinto de Herbón e Luís O Caruncho
