O Gabinete de Normalización Lingüística (GNL) do Concello de Ferrol impulsa o web www.ferrolconlingua.com para difundir e dar a coñecer as actividades de promoción da lingua galega.
A través deste espazo pódese acceder a información sobre accións de promoción lingüística dirixidas ao mundo do deporte, accións para os mercados, ou as accións para a mocidade e o ensino.
Desde o GNL de Ferrol traballan para procurar unha implicación real dos grupos de traballo, das entidades, das asociacións, das persoas interesadas en participar. Todo isto impulsado desde o Consello Municipal da Lingua, órgano de asesoramento en materia de política lingüística.
A idea, dinamizar o uso de idioma en espazos visíbeis, estratéxicos…
En Ferrol con lingua pódese acceder a información sobre as accións no ámbito sociocultural (ensino e mocidade, deporte, infancia e toponimia), no socioeconómico (campaña de promoción lingüística nos mercados) e no da propia administración.
Ademais, tamén conta con outros espazos e apartados, como En Ferrol fálase, que recollerá unha serie de entrevistas ás persoas representantes dos sectores sociais aos que se dirixen as distintas actividades de dinamización municipais. A primeira das entrevistas, xa publicada, foi co xerente do FC Racing de Ferrol e, nuns días, poderase ver a dos rapaces e rapazas participantes no XI Festival A Mocidade coa lingua, que tivo lugar o pasado 18 de xuño.
Ferrolconlingua.com. O proceso de normalización lingüística de Ferrol na rede
Ferrol con lingua é un novo web deseñado para difundir as accións de promoción da lingua galega que se desenvolven desde o Gabinete de Normalización Lingüística do Concello de Ferrol
