O Correlingua está organizado pola AS-PG, a CIG-Ensino, a Mesa, e os concellos de Lugo, Pontevedra, Santiago e Vigo, e conta tamén coa colaboración das deputacións de Lugo, da Coruña e de Ourense, así como os distintos concellos das comarcas onde ten que ten lugar a actividade.
As entidades organizadoras veñen realizando esta actividade escolar como proposta de carácter lúdico-educativo que pretende convidar á mocidade e aos centros de ensino a participar nun acto público de reivindicación do dereito a medrar en galego e tamén a exercer de maneira efectiva como galegos e galegas a través do uso do noso idioma, única forma de garantir o seu futuro. Trátase de darlle protagonismo social e voz ao sector fundamental no proceso de normalización da lingua galega e que debe ter un papel activo no mesmo.
Para este ano elixiuse como lema da actividade “En galego sempre somos”, sinalando a importancia da lingua como mellor vehículo de expresión da nosa identidade colectiva e xa que logo, como medio de unión entre as galegas e galegos.
Premios do Correlingua 2011
Unha das accións previas ao desenvolvemento da carreira é a convocatoria de varios concursos, nos que participan de xeito activo moitos centros de ensino.
O premio á elaboración do manifesto foi para o IES Agra de Leborís, da Laracha; o de banda deseñada para o CPI San Martiño, de Pontevedra; e o de vídeo para o IES Fontem Albei, da Fonsagrada.
No concurso musical Cantalingua participaron máis de 30 grupos, e resultaron gañadores Zënzar, Som do Galpom e Sacha na hora, que actuarán nas festas final de carreira, na que tamén actuará o mago Martín Camiña e o músico Pablo Díaz.
CALENDARIO
-2/5/11: Santiago de Compostela
-3/5/11: Baixo Miño – Salceda de Caselas
-4/5/11: A Coruña
-4/5/11: O Morrazo – Bueu
-5/5/11: Ferrolterra – Narón
-6/5/11: A Mariña – Burela
-6/5/11: A Estrada
-9/5/11: O Carballiño
-9/5/11: A Ribeira Sacra – Monforte de Lemos
-10/5/11: Pontevedra
-11/5/11: O Salnés – Vilagarcía de Arousa
-11/5/11: Lugo
-12/5/11: Vigo
-13/5/11: Ourense
-13/5/11: Monterrei – Verín
En galego sempre somos. Comeza o Correlingua 2011
45.000 rapaces e rapazas participan nunha nova edición do Correlingua, que percorre 15 comarcas do país entre o 2 e o 13 de maio, e no que participan 400 centros de ensino e co que colaboran varias organizacións sociais e varias entidades públicas
