Convocatoria dunha praza de técnico/a superior de galego-portugués na USC

A Universidade de Santiago de Compostela publicou no DOG do 19 de maio de 2025 as bases da convocatoria dunha praza de técnico/a superior de linguas modernas, perfil galego-portugués, pola quenda de acceso libre.

Características da praza

Trátase dunha praza da categoría profesional de técnico/a superior de linguas modernas (galego-portugués), grupo I, do Convenio colectivo para o persoal laboral da USC, que se cubrirá pola quenda de acceso libre.

Requisitos de titulación

Título de grao, doutor/a, licenciado/a, arquitecto/a, enxeñeiro/a ou equivalentes. En relación cos coñecementos de galego, esíxese o certificado de nivel Celga 5. As persoas aspirantes que non presenten a certificación correspondente deberán realizar a proba de lingua galega.

Sistema de selección

O sistema de selección será o concurso-oposición. A fase de oposición consistirá nos seguintes exercicios:

• Primeiro exercicio: estarán exentas as persoas que acrediten o Celga 5. En caso contrario consistirá en dúas probas: comprensión escrita/oral e expresión escrita e comprensión escrita/oral e expresión oral.
• Segundo exercicio: cuestionario de 120 preguntas e 5 de reserva sobre o bloque de coñecementos específicos.
• Terceiro exercicio: proba práctica. Consistirá en varias probas: comprensión oral en lingua portuguesa e en lingua galega, elaboración e entrega de dúas programacións didácticas (unha paara cada lingua) e defensa oral das programacións didácticas e cadansúa unidade didáctica.
• Cuarto exercicio: cuestionario de 30 preguntas e 3 de reserva sobre o bloque de coñecementos non específicos do programa. Este exercicio é obrigatorio e non eliminatorio.

Na fase de concurso valorarase a experiencia laboral (máximo 35 puntos) e formación (até 5 puntos).

Solicitudes e prazo

De acordo coa base terceira, o prazo de presentación de solicitudes será de vinte días naturais a partir do día seguinte ao da publicación do anuncio da convocatoria no Boletín Oficial del Estado (BOE). O anuncio publicouse no BOE do 16 de xuño de 2025, polo que o prazo está aberto desde o 17 de xuño ao 7 de xullo (por ser inhábil o último día de prazo).

A solicitude debe formalizarse e aboar a taxa correspondente unicamente por medios electrónicos. Empregarase o seguinte formulario da sede electrónica: https://sede.usc.es/formularios/solicitudes/seleccionPersoalLaboral.htm

Dereitos de exame

Para inscribirse neste proceso selectivo é necesario pagar unha taxa por dereitos de exame de 44,17 euros.