Convocadas as axudas da Deputación de Pontevedra para actividades de dinamización lingüística dirixidas ás entidades culturais

A Deputación Provincial de Pontevedra publicou nos BOP do 16 de febreiro a convocatoria de axudas para realizar actividades de dinamización da lingua galega durante 2026 dirixidas a entidades culturais sen fins lucrativos (procedemento SIA 215828). O prazo está aberto durante un mes, é dicir, até o 16 de marzo.

Obxecto

Actividades que se realicen entre o 1 de xaneiro e o 31 de decembro de 2026 das seguintes características:

• a. Fomento do uso e prestixio da lingua galega a través de programas de normalización e dinamización lingüística:
  • Certames literarios e xornalísticos que promovan a creación en lingua galega nos rangos de idade onde o galego ten menos uso e prestixio.
  • Actividades de creación que permitan asociar a lingua galega a valores positivos: modernidade, lecer, novas tecnoloxías, videoxogos.
  • Proxectos de creación artística nos ámbitos audiovisual, musical, dos pódcasts, dos videoxogos e da banda deseñada, especialmente dirixidos á infancia e á mocidade.
  • Xornadas e eventos que promovan a creación en lingua galega.
• b. Sociolingüística e toponimia:
  • Estudos e publicacións sobre sociolingüística.
  • Xornadas e publicacións de recuperación da toponimia.
• c. Fomento do emprego do galego no comercio e na industria.
• d. Campañas para a dinamización, o uso e o prestixio da lingua galega no ámbito comercial e socioeconómico.
• e. Recoñecementos e distincións:
  • Accións que recoñezan o labor de persoas ou colectivos que transmitan valores positivos asociados á lingua galega a través do seu uso e defensa.
• f. Fomento do emprego do idioma galego
  • Actividades de captación de neofalantes.
  • Actividades de dinamización e normalización da lingua galega que fomenten o emprego activo da lingua, a socialización en galego e que o asocien con valores positivos (modernidade, prestixio, lecer, diversión…), especialmente dirixidas á infancia e á mocidade.

Destinatarias

Entidades sen fins de lucro, con domicilio fiscal na provincia de Pontevedra e que desenvolvan as súas actividades na provincia.

Orzamento

150.000 euros

Solicitudes

Presentaranse obrigatoriamente por vía electrónica a través da Sede Electrónica da Deputación de Pontevedra no procedemento SIA 215828. 

Prazos

• Para solicitar as axudas: até o 16 de marzo de 2026.
• Para xustificar as axudas: até o 28 de febreiro de 2027

Valoración das candidaturas

Na base décimo cuarta recóllense os criterios de valoración das candidaturas, entre as que están as seguintes:

• calidade e contido técnico da proposta,
• o orzamento,
• a porcentaxe de financiamento que se solicita,
• experiencia, traxectoria e especialización da entidade no desenvolvemento de actividades en prol da normalización lingüística,
• grao de consolidación e sensibilización lingüística da entidade
• que sexa un programa dirixido a un ámbito estratéxico (socioeconómico, educación, familia, mocidade, lecer e novas tecnoloxías),
• que sexa un programa que se desenvolva en rede ou en colaboración con outras entidades.