Concesión de axudas da Fegamp para os SNL da administración local

En decembro de 2009 a Consellería de Educación e Ordenación Universitaria da Xunta e a Fegamp asinaron un convenio de colaboración para o fomento do uso do galego na Administración local, coa finalidade de distribuír os fondos que a Secretaría Xeral de Política Lingüística tiña asignados para a convocatoria de axudas para o mantemento dos SNL da administración local en 2009 e que, por razóns de prazos, non convocou.

Despois da sinatura dese convenio, a Fegamp púxose en contacto coas diveras entidades que tiñan SNL para a concesión desas subvencións que agora se resolven.

Achegamos aquí, en formato .pdf, o cadro completo de asignación de cantidades por entidade local

Deste xeito, 63 concellos recibiron cantidades comprendidas entre os 1.369,81 € (Santiso) e os 34.829,52 € (Vigo).

Do total dos 63 concellos que recibiron esta subvención:

-41 son da provincia da Coruña

-7 son da provincia da Lugo

-5 son da provincia de Ourense

-10 son da provincia de Pontevedra

Ademais, tamén recibiron apoio económico as catro deputacións:

-A Coruña: 45.000,00 €

-Lugo: 12.748,05 €

-Ourense: 22.713,10 €

-Pontevedra: 30.014,07 €

A cantidade total distribuída foi de 602.665,40 €.

O repartimento de fondos fíxose de acordo cos seguintes criterios:

1. LÍMITE DA ACHEGA ECONÓMICA

A cantidade subvencionada para cada Entidade Local terá os seguintes límites:

a) Un máximo do 75% da cantidade subvencionábel. Enténdese como cantidade subvencionábel a cantidade total xustificada menos as subvencións recibidas doutras administracións.

b) A Contía máxima subvencionábel por entidade local será de 45.000 €.

2. CRITERIOS DE REPARTIMENTO

Sempre respectando os límites máximos fixados no punto anterior, os criterios de repartimento serán os seguintes:

a) Cantidade fixa de 6.000 € para cada entidade local

b) A contía restante repartirase mediante unha porcentaxe lineal para cada concello da cantidade subvencionábel, tal e como se define no apartado a) do punto 1, minorada a cantidade fixa estipulada no punto anterior.