Axudas dirixidas aos concellos de Pontevedra para actividades de promoción da lingua

A Deputación Provincial de Pontevedra publicou no BOP do 16 de marzo a convocatoria de axudas para realizar actividades de dinamización da lingua galega durante o ano 2026 dirixidas a concellos de menos de 50.000 habitantes. O prazo está aberto durante un mes.

Obxecto desta convocatoria

Actividades que se realicen  entre o 1 de xaneiro e o 31 de decembro de 2026 das seguintes características:

1. Fomento do uso e prestixio da lingua galega a través de programas de normalización e dinamización lingüística:
   • Certames literarios e xornalísticos que promovan a creación en lingua galega nos rangos de idade onde o galego ten menos uso e prestixio.
   • Actividades de creación que permitan asociar a lingua galega a valores positivos: modernidade, lecer, novas tecnoloxías, videoxogos.
   • Proxectos de creación artística nos ámbitos audiovisual, dos pódcasts, dos videoxogos, literario, musical e da banda deseñada, especialmente dirixida á infancia e á mocidade.
   • Xornadas e eventos que promovan a creación en lingua galega.
2. Sociolingüística e toponimia:
   • Estudos e publicacións sobre sociolingüística.
   • Xornadas e publicacións de recuperación da toponimia.
3. Fomento do emprego do galego no comercio e na industria.
4. Campañas para a dinamización, o uso e o prestixio da lingua galega no ámbito comercial e socioeconómico.
5. Recoñecementos e distincións:
   • Accións que recoñezan o labor de persoas ou colectivos que transmitan valores positivos asociados á lingua galega a través do seu uso e defensa.
   • Calquera outra actividade ou programa de actividades cuxo obxectivo sexa fomentar o uso do idioma galego entre a poboación, nomeadamente entre a infancia e a mocidade.
6. Fomento do emprego do idioma galego:
   • Actividades de captación de neofalantes.
   • Actividades de dinamización e normalización da lingua galega que fomenten o emprego activo da lingua, a socialización en galego e que o asocien con valores positivos (modernidade, prestixio, lecer, diversión), especialmente dirixidas á infancia e á mocidade.

Entidades destinatarias

Concellos da provincia de menos de 50.000 habitantes

Orzamento

150.000 euros

Solicitudes

Presentaranse obrigatoriamente por vía electrónica a través da Sede Electrónica da Deputación de Pontevedra, no procedemento SIA 2329331.

Prazos

• Para solicitar as axudas: do 17 de marzo até o 16 de abril de 2026.
• Para xustificar as axudas: até o 28 de febreiro de 2027.

Valoración das candidaturas

Na base décimo terceira recóllense os criterios de valoración das candidaturas, entre as que están as seguintes:

• Calidade e contido técnico da proposta,
• o orzamento,
• a porcentaxe de financiamento que se solicita,
• experiencia, traxectoria e especialización no desenvolvemento de actividades, onde se valora que sexa un programa dirixido a un ámbito estratéxico (socioeconómico, educación, familia, mocidade, lecer e novas tecnoloxías) ou que sexa un programa que se desenvolva en rede ou en colaboración con outras entidades,
• o grao de consolidación e sensibilización lingüística do concello, onde que se valora dispoñer dun SNL, o número de edicións do programa ou o número de accións dentro do programa.

Os concellos da provincia de Pontevedra podían dotarse de servizo de normalización lingüística beneficiándose doutra convocatoria de axudas da propia Deputación. O prazo para solicitar estas axudas para a creación, o mantemento ou o reforzo de SNL finalizou o 5 de marzo.