A Deputación Provincial da Coruña anunciou as bases do programa de axudas para a creación, mantemento e reforzo de servizos de normalización lingüística nas entidades locais. Esta regulación publicouse corrixida no BOP da Coruña do 22 de decembro de 2020.
ENTIDADES BENEFICIARIAS
Poderán solicitar esta subvención concellos da provincia da Coruña de 5.000 ou máis habitantes ou agrupacións de concellos, mancomunidades e outras entidades locais que, entre eles, cheguen ao mesmo número mínimo de habitantes.
MODALIDADES DE AXUDAS:
A convocatoria establece tres modalidades de axudas:
– creación de novos servizos de normalización lingüística
– mantemento de servizos de normalización lingüística xa existentes
– reforzo de servizos de normalización lingüística xa existentes (única modalidade a que poden concorrer as cidades da provincia, A Coruña, Ferrol e Santiago de Compostela)
IMPORTE DAS AXUDAS
As axudas servirán para financiar as retribucións do persoal técnico dos servizos de normalización lingüística (SNL).
O importe total do crédito consignado (500.000 euros) distribuirase a partes iguais entre as entidades beneficiarias, que recibirán unha cantidade fixa de 15.000 euros se a contratación se produce durante todo ano e a xornada completa. O importe reducirase proporcionalmente á xornada desenvolvida polo persoal.
FORMA E PRAZO PARA A PRESENTACIÓN DE SOLICITUDES
De acordo coa base 7.1 da convocatoria, os prazos de inicio e fin de presentación de solicitudes determinaranse a partir da publicación no BOP da convocatoria segundo a remisión da Base de Datos Nacional de Subvencións (BDNS). Este extracto publicouse no BOP do 15 de xaneiro de 2021 e estableceu como data límite para presentar solicitudes o 29 de xaneiro ás 14.00 horas.
As solicitudes presentaranse telematicamente na sede electrónica da Deputación da Coruña, a través da plataforma de tramitación electrónica da Deputación (SUBTeL).
Así mesmo, na base 9.1 tamén se especifica o prazo de xustificación das subvencións unha vez concedidas: até as 14:00 horas do 30 de abril de 2022.
Información máis detallada:
– nas bases específicas reguladoras desta convocatoria, en .pdf (BOP do 22 de decembro de 2020)
– no extracto da convocatoria, en .pdf (BOP do 15 de xaneiro de 2021)
ADDENDAS
– Resolución provisional das axudas, en .pdf (BOP da Coruña do 30 de marzo de 2021)
– Resolución definitiva das axudas, en .pdf (BOP da Coruña do 14 de xullo de 2021)
Axudas da Deputación da Coruña para creación, reforzo e mantemento de SNL en 2021
A Deputación Provincial da Coruña anunciou no BOP do 22 de decembro de de 2020 as bases reguladoras da convocatoria de subvencións para a creación, mantemento e reforzo de SNL durante o ano 2021, dirixida a entidades locais. O prazo de presentación de solicitudes finaliza o 29 de xaneiro de 2021 ás 14.00.
