As mellores declaracións do concurso Lingua de Amor. Textos e cancións gañadoras

O xurado de Lingua de Amor 2010 estivo composto por Dolores Vilavedra, crítica literaria; Manuel Gago, director de culturagalega.org; Francisco Alvarellos, da produtora A Casa de Música, e Yolanda Fernández e Nancy Domínguez, técnicas do Consello da Xuventude de Galicia (CXG), entidade organizadora do certame.



O obxectivo principal deste concurso é dinamizar o uso da lingua galega entre a xente nova nas súas comunicacións a través da rede e nos espazos de lecer.



Tras a deliberación do xurado, resultaron gañadoras as seguintes creacións:



DECLARACIÓNS DE AMOR EN GALEGO A TRAVÉS DA REDE



Categoría A (de 14 a 19 anos):



1.º Premio: De mesturar a túa suor coa miña colonia, Uxía Pérez González (Vigo)

“Poderíamos fusionarnos. os nosos corpos. quizais tamén as nosas mentes. os sábados pola noite serían de cervexa e discos. de ti espido no sofá. do meu pelo na alfombra. de sexo. de mesturar a túa suor coa miña colonia. imaxínonos comendo cereais algunhas mañás. contándonos os hematomas das mordeduras nacidas nas noites de insomnio. en silencio.”

2.º Premio: Necesidade, Hugo Eiroá Dayán (Burela)



“Se me faltas ti, e as ganas de comer, morro.”

3.º Premio: Querer con pronome, Jessica Amado Dosil (Outes)

“Cheísta de corazón, nunca sei se “che quero” ou “te quero”.

Eu, para asegurarme,

quéroche e quérote.

En tódalas variedades dialectais posibles, meu sol.”

Categoría B (de 20 a 35 anos):



1.º Premio: Imposto (r), Alcira Otero Cruz (Miño)



“Solicito algo máis que un borrador, unha cita previa. Insisto por internet, por teléfono e ata na túa oficina. Síntome obrigada a declarar: ingreso alterada, reteño o medo, gasto saliva e deduzo desprezo. Só desexo IRPF, unha Íntima Relación, Por Favor!



Marca cun X o resultado:



A ingresar [ ] A devolver [ ]”

2.º Premio: Sábesme a g(h)loria, Antonio Iglesias Mira (Arteixo)



“Cuando nos bicamos

tu e eu

somos realmente bilingües.”

3.º Premio: Amoreando amores, Carme Otero Cruz (Santiago de Compostela)

“Amor sabor amorodo

amoricoque amoreído

amorío amortecedor



será amoral, amorfo ou amortizable tanto amor?”



CANCIÓNS DE AMOR EN LINGUA GALEGA



1.º Premio: Para beber auga e viño, Pablo González Costas (Cangas)

2.º Premio: Terra de amor, Xesús Xosé Iglesias González (Salvaterra do Miño)



3.º Premio: Fala galego, Marcos Fernández Vázquez (Ourense)



Ademais, todas estas persoas recibirán un lote de libros e música en galego.

O sábado 26 de xuño, ás 12.00 h, terá lugar o acto de entrega de premios na Biblioteca Pública Ánxel Casal, en Santiago de Compostela.