Aprobamos as liñas de traballo para este 2023

O sábado pasado tivo lugar a Asemblea Xeral ordinaria da CTNL, a cita anual para dar conta do traballo realizado durante o exercicio pasado e para aprobar as accións que se levarán a cabo durante o actual.

Liñas de acción para 2023

Como é habitual, na asemblea avaliouse o traballo desenvolvido durante o último ano e aprobáronse as liñas de acción para 2023, que incluirán actividades consolidadas, coma o LGx15, os Premios Mil Primaveras ou o proxecto Agasallo.

Tamén se levarán a cabo accións formativas, seguimento da política lingüística das institucións, difusión das convocatorias de prazas e axudas, información sobre accións para a mellora do uso e prestixio da lingua etc.

Coñecermos a opinión de socias e socios

Unha das accións que se aprobou é o envío dunha consulta ás persoas asociadas da CTNL, para coñecermos a vosa opinión sobre aspectos de funcionamento e comunicación da nosa asociación, coa dobre finalidade de renovar o web e mellorar a colaboración coas persoas que formamos parte da CTNL.

Lixeira suba de cotas anuais

Outro dos acordos que se adoptou nesta asemblea foi unha suba de 5 euros na cota anual de socios/as, que por tanto pasan a ser de 30 euros a cota xeral e 20 euros a cota reducida (para estudantes e desempregadas/os). É a primeira vez, tras 27 anos de existencia, que a CTNL sobe as cotas, co obxectivo de ter máis liquidez para desenvolver sen problema as actividades programadas ao longo do ano.



Liñas de acción para 2023, en .pdf