A nova sección de A Nosa Terra, ANT Lingua é un espazo de divulgación do idioma galego que se vai renovar cada día e que quere contar coa colaboración dos/as lectores/as para encontrar aqueles temas de maior interese. A idea é que cada post fale dun tema concreto da lingua, en temas como a ortografía, a gramática, a onomástica ou a sintaxe. A serie terá en conta as achegas dos lectores, tanto nos temas que tratar como naqueles aspectos que se poden completar coa visión, experiencia e coñecementos de cada lector.
ANT Lingua é a primeira das seccións que terán cabida no novo espazo ANT Útil, que no futuro irá albergando novas series pensadas para ampliar os saberes dos/as usuarios/as da web de A Nosa Terra Diario. Temas tan diversos como a análise das tendencias de moda e formas de vida, destinos imprescindíbeis para o lecer en Galiza, seguimento do mellor e o peor da TDT ou a análise das estreas de cinema e DVD polo crítico Xosé Valiñas son algúns dos pratos que están a preparar neste xornal.
ANT Lingua. Espazo sobre dúbidas lingüísticas en A Nosa Terra Dixital
O diario dixital A Nosa Terra inaugura ANT Lingua, un espazo sobre como mellorar a fala e escrita en galego baseado na participación dos usuarios e usuarias do xornal
