A plataforma Queremos Galego anunciou na mañá do 27 de marzo a convocatoria de manifestación para o 17 de maio, que terá o mesmo lema ca a anterior, Lingua vital xa! Paremos a emerxencia lingüística, comezará ás 12.00 h na Alameda e acabará na praza do Obradoiro.
Foliada como homenaxe á cultura popular
A manifestación concluirá cunha foliada pola lingua na praza do Obradoiro de Santiago de Compostela. A coordinadora de Queremos Galego, Celia Armas, indicou que “Será unha homenaxe masiva á lingua e a cultura popular que se mantivo viva na voz das cantareiras, resistindo a todos os intentos de apagala”.
Queremos Galego fai un chamamento ás agrupacións, asociacións e colectivos da música galega a participar na grande foliada pola lingua e anima a todas as persoas que participen na manifestación a traer as súas pandeiretas.
Plenarios de Queremos Galego
A plataforma cidadá, da cal forma parte a CTNL, desenvolverá plenarios por toda Galiza durante as próximas semanas, con dous obxectivos:
- difundir a convocatoria de manifestación nacional e foliada pola lingua e
- comezar un proceso social amplo, plural e participativo para avaliar o cumprimento do Plan xeral de Normalización da lingua galega (PXNLG) e dos acordos nacionais e internacionais a favor do galego, detectar os obstáculos que impediron o seu cumprimento e concretar como se deben aplicar as medidas estabelecidas nestes acordos unánimes para garantir a súa eficacia. Este proceso, que se chamará Lingua vital, será presentado na praza do Obradoiro o 17 de maio.
Información máis detallada:
