A CTNL solicita ao Concello de Oleiros que inclúa a praza de TNL na súa RPT

No Boletín Oficial da Provincia da Coruña do 14 de decembro de 2018 (con corrección de erros no BOP do día 20 de decembro do mesmo ano), o Concello de Oleiros publicou a aprobación definitiva da súa relación de postos de traballo (RPT). Nela inclúese, entre outras áreas, a de Cultura, Deportes, Ensino, Promoción Económica, Formación e Emprego, Xuventude e Normalización Lingüística (número 8), e dentro dela o Servizo de Cultura e Normalización Lingüística (numerado como 08.03). Con todo, a pesar de contar na RPT cun servizo destas características, entre os seus postos de traballo non figura o de técnico/a de normalización lingüística, cando a entidade si ten no cadro de persoal unha persoa que desenvolve ese labor de forma continuada desde hai 10 anos.

A continuidade no tempo do SNL en Oleiros mostra o interese da entidade local por dotarse dun departamento especializado para asesorala na súa política lingüística e para exercer con eficacia as competencias en normalización lingüística que ten como administración local. Así mesmo, o Concello de Oleiros aprobou en 2004 a Ordenanza de uso do galego na Administración municipal de Oleiros (BOP da Coruña do 22 de abril de 2004), cuxo artigo 2.4 recolle que a entidade manterá un SNL para impulsar a normalización do galego.

Daquela, tanto a lexislación xeral en materia de lingua galega como a ordenanza específica do Concello de Oleiros reforzan o carácter estrutural do posto de técnico/a de normalización lingüística na institución e reflicten a necesidade de contar cun departamento técnico estable, dotado de persoal e orzamento suficiente para analizar a situación da lingua na entidade local, no municipio ou na comarca, asesorar a entidade en política lingüística e para planificar, xestionar, executar e avaliar accións e programas de normalización lingüística que interveñan nas áreas prioritarias onde o galego perde prestixio ou utilidade. En definitiva, para exercer de forma eficaz as súas competencias en normalización lingüística.

Por outra banda, de acordo co artigo 38 da Lei 2/2015, do 29 de abril, do emprego público de Galicia, a relación de postos de traballo “é un instrumento técnico de carácter público que inclúe todos os postos de traballo de natureza funcionarial e laboral existentes en cada unha das administracións públicas”. A través deste documento as entidades “estruturan a súa organización, clasifican os postos de traballo existentes no seu ámbito e determinan o seu contido para a súa selección e provisión, procurando organizar, racionalizar e ordenar o persoal co obxecto de facilitar unha eficaz prestación dos servizos públicos.”

Tendo en conta a traxectoria de compromiso do Concello de Oleiros co traballo técnico en normalización lingüística como servizo público que se presta en todos os ámbitos de influencia da institución, desde a CTNL botamos en falta que esta vontade se plasme nun documento tan importante como a relación de postos de traballo (RPT). Non incluír o posto de técnico/a de normalización lingüística na RPT supón desaproveitar a oportunidade de consolidalo e darlle estabilidade, tendo en conta que é un posto necesario, ten carácter estrutural e, ademais, a entidade local xa vén contando con el desde hai unha década. Alén disto, a súa inclusión na relación de postos de traballo permitiría consolidalo definitivamente e superar a inestabilidade laboral deste tipo de postos de traballo nas administracións públicas.



FUNCIÓNS DO POSTO DE TÉCNICO/A DE NORMALIZACIÓN LINGÜÍSTICA

Así mesmo, a CTNL solicitou que se lle asignen ao posto as funcións que veñen establecidas nas convocatorias de axudas da Xunta de Galicia e da Deputación Provincial da Coruña.

Escrito dirixido ao Concello de Oleiros, en pdf.