No punto 1.º das bases sinálase que as retribución serán de «425 euros brutos ao mes, incluído o prorrateo de pagas extras», por unha xornada de 20 horas semanais. Debido ás tarefas e funcións propias dun técnico ou dunha técnica de normalización lingüística, ás súas capacidades, coñecementos e competencias e á titulación esixida no proceso de selección (unha licenciatura), a praza debe ser ou estar para todos os efectos equiparada ás prazas de funcionario de grupo A. Polo tanto, as retribucións deben ser as correspondentes a esa categoría e acordes ao nivel de estudos esixido (unha licenciatura).
Por estas razóns, desde a CTNL solicitóuselle ao Concello de Irixoa –a través dun escrito enviado ao alcalde con copia para todos os grupos políticos con representación municipal– que, para que poida seleccionar o persoal máis e mellor capacitado, para optimizar o labor do SNL local, para contribuír a mellorar o proceso de normalización da lingua galega desde o Concello, e para que a persoa beneficiaria do proceso de selección traballe nunhas condicións laborais minimamente dignas e acordes co seu nivel de estudos se modifique o punto relativo ás retribucións da base 1.ª da convocatoria, para que a remuneración económica sexa acorde coa titulación esixida, e que, polo tanto, a praza de técnico/a de normalización lingüística sexa ou estea para todos os efectos equiparada ás prazas de funcionarios/as do grupo A.
A CTNL reclámalle ao Concello de Irixoa unhas condicións laborais minimamente dignas para a praza de técnico/a de normalización lingüística
Logo de coñecidas as bases de selección para a provisión temporal dun/ha técnico/a de normalización lingüística no Concello de Irixoa, desde a CTNL detectamos na convocatoria cuestións graves relativas ás condicións laborais, nomeadamente as referidas ás remuneracións económicas.
