Na tarde do pasado venres, 3 de xullo, a sede da Fundación Paideia na Coruña acolleu o acto de entrega do XVII Premio Rosalía de Castro de Lingua 2026. A música e as palabras de Sheila Patricia conduciron o acto onde se entregaron os galardóns nas tres categorías dos premios:
a) persoa que máis destaque na promoción da lingua galega e cunha identidade propia e unhas características xenuínas para empregala en todos os ambientes e con todos os estratos sociais.
b) entidade que máis destaque na promoción da lingua galega (sexa cal for a súa fórmula xurídica ou modo de constitución: empresas, asociacións, colectivos).
c) proxecto de dinamización lingüística concreto (ferramentas, publicacións ou coleccións, portais web…) que realice un traballo específico cos tramos da poboación de menor idade, infancia e mocidade e que atenda espazos emerxentes de uso da lingua co obxectivo de premiar a innovación e o futuro.
Carlos Manuel Callón Torres
Na categoría A (persoa que máis destaca na promoción da lingua galega), o premio recaeu en Carlos Manuel Callón Torres, de quen o xurado valorou especialmente o seu labor como «activista referencial en defensa dos dereitos lingüísticos», e mais o valor das súas publicacións, convertidas «en importantes ferramentas para promover o debate a favor da normalización do idioma galego, así como para mellorar a escrita e a fala da nosa lingua».
A Gramola Gominola
Na categoría C foi recoñecida, por unha parte, a banda de rock infantil A Gramola Gominola polo seu «compromiso firme co uso e defensa públicos da lingua galega» e unha traxectoria de máis de dez anos dirixida ao público infantil e familiar a través da música, dos contidos audiovisuais e dos libro-discos acompañados de materiais didácticos.
Vitamina G
Tamén como proxecto de dinamización lingüística dirixido á infancia, foi recoñecido o labor educativo da docente Mariña Lema con Vitamina G. O xurado salientou a súa orixe nun centro educativo dun barrio coruñés cun contexto altamente desgaleguizado e con alumnado procedente de diferentes realidades lingüísticas, ben como o seu valor como exemplo de cohesión social e a súa capacidade para ser exportado a outros contextos semellantes.
Coordinadora de Traballadores/as de Normalización da Lingua (CTNL)
E na categoría B o XVII Premio Rosalía de Castro recoñeceu na CTNL a súa traxectoria consolidada de 30 anos e mais o seu papel como entidade referente «no desenvolvemento, coordinación e racionalización das políticas e accións de normalización lingüística en Galicia».
A presidenta da CTNL, Mónica Fernández Valencia, agradeceu premio, parabenizou as compañeiras desta distinción e dedicou este recoñecemento “a todas as profesionais da normalización lingüística que, día tras día, desenvolven o seu labor con rigor, creatividade e convicción”. Tivo tamén un recordo especial para Marta Souto. Neste documento pódense consultar as palabras de agradecemento da presidenta da CTNL.
O xurado do XVII Premio Rosalía de Castro de Lingua 2026 estivo presidido pola deputada de Lingua, Sol Agra Tuñas, e integrado por Xosé Ramón Freixeiro Mato, Álvaro López García e Irma Silva Hervella (persoas premiadas na edición anterior) e a técnica de normalización lingüística da Deputación Dores Sánchez Alegre como secretaria.
O galardón consiste en 5000 euros por categoría e un cadro de María Maquieira titulado Rosalía de Castro (reprodución artística sobre papel Canson 280 g do orixinal: debuxo e collage a bolígrafo, lapis e acrílico sobre papel).
Galería de fotos
O acto noutros medios
- Web da Deputación Provincial da Coruña
- La Voz de Galicia (edición da Coruña) do 4 de xullo de 2026
- Galicia Xa (4 de xullo de 2026)
