[179] d-Lingua nace contigo - CTNL Coordinadora de Traballadores/as de Normalización da Lingua

[179] d-Lingua nace contigo

Benquerida/o amiga/o, Desde a CTNL, xunto coa CGENDL e a SXPL, estamos a colaborar co Centro de Documentación Sociolingüística de Galicia (CDSG) do Consello da Cultura Galega na posta en marcha da plataforma d-Lingua, unha ferramenta que pretende mellorar e que tenta rendibilizar o xeito de traballar a prol da normalización lingüística. d-Lingua vai ser a plataforma para que os recursos destinados ao fomento do galego sexan máis frutíferos. d-Lingua vai incitar a mudanza nos nosos hábitos de traballo a partir de agora, mais d-Lingua non abonda, porque ti es o realmente imprescindible. d-Lingua vai axudar a que un folleto para a galeguización de nomes e apelidos feito por un ENDL da Mariña poida ser reeditado por un SNL do Morrazo, ou que unha guía de enderezos de webs feita por un SNL de Bergantiños poida ser adaptada e reeditada por unha asociación de Ourense. d-Lingua, como ves é importante, pero non ha ser nada, se faltas ti. d-Lingua non é un produto feito e acabado, é un proxecto vivo de futuro. De ti vai depender a súa utilidade e o seu éxito. É o momento de cooperar e de compartir, por iso d-Lingua ten futuro contigo. Para participarmos neste proxecto organizamos unha pequena xornada para comezarmos a coñecer a plataforma e para resolver diversas dúbidas que pode haber con respecto a licenzas, dereitos de autoría, etc. Enviámosche aquí a información e agardamos a túa participación. Se ti es de lingua, d-Lingua tes que ser ti Un cordial saúdo, CTNL

Xornada de formación e coñecemento d-Lingua para a CTNL

-DÍA: xoves 22 de novembro

-HORA: de 17.00 h a 20.00 h

-LUGAR: Biblioteca do Consello da Cultura Galega (Pazo de Raxoi. Santiago de Compostela).

Para participar debes confirmar a túa asistencia enviando un correo-e ao enderezo-e info@ctnl.org. Debido á capacidade do lugar e á dinámica da xornada, o número máximo de asistentes será de 30, polo que, en caso de haber máis persoas interesadas, respectarase a orde de inscrición.

PROGRAMA DA XORNADA

– Presentación e visita guiada pola plataforma.

– Creative Commons: descrición da filosofía e tipos de licenzas.

– Os recursos da normalización lingüística: presentación de tipoloxías principais.

– Os dereitos de autoría: sesión práctica. Información e resolución de dúbidas sobre dereitos de autoría en recursos de normalización lingüística, principalmente en SNL. Presentación dun protocolo de cesión de dereitos apto para d-Lingua.