O DOG do venres 9 de setembro publica a Orde pola que se deixa sen efecto a convocatoria de subvencións ás entidades locais para a promoción do uso da lingua galega, unhas axudas que a Xunta de Galicia vén convocando desde o ano 1991 e que agora, por vez primeira en 20 anos, quedan anuladas.
Desde a CTNL consideramos esta suspensión como moi grave e irresponsábel, que suporá a eliminación de servizos de normalización lingüística (SNL) en concellos e de necesarias accións para a promoción da lingua. Ademais, a gravidade e irresponsabilidade desta suspensión increméntase co feito de que, tal e como desde a CTNL denunciamos hai uns días, tanto o secretario xeral de Política Lingüística, Anxo Lorenzo, como os membros do seu gabinete, se negaron a dar información sobre a tardanza na resolución destas subvencións, convocadas hai 6 meses e das que nada se soubo desde aquela.
Agora cúmprense as peores expectativas e a Secretaría Xeral de Política Lingüística suspende estas axudas que xa comezaron a reducir de xeito drástico desde hai dous anos e que son imprescindíbeis para que desde os concellos se poidan desenvolver accións para o fomento da lingua galega.
Loxicamente, esta decisión é totalmente contraditoria coa propagandística Rede de Dinamización Lingüística que a SXPL está publicitando desde hai dous anos, sen que desde aquela fose constituída nin tivese ningún tipo de actividade, tan só anuncios, notas de prensa e fotos de xuntanzas con algúns alcaldes, ao mesmo tempo que en 2010 lles reduciron aos concellos as axudas económicas e que agora xa directamente suspenderon.
Por estas razóns, e ante a gravidade e irresponsabilidade dos feitos, desde a CTNL pedimos a inmediata dimisión do secretario xeral de Política Lingüística, Anxo Lorenzo.
