Do mércores 20 ao venres 22, Carballo acolle a sétima edición do Curso de verán de dinamización lingüística “Traballando en lingua”, que este ano se centra en (re)pensar o discurso normalizador. Nel interveñen especialistas como Sánchez Carrión “Txepetx”, Pilar García Negro, Fermín Bouza, Celso A. Cáccamo, Iván Méndez, Genma Sanginés, Manuel N. Singala, Valentim Fagim, Nel Vidal, etc.
A Universidade da Coruña, en colaboración co Concello de Carballo, a Coordinadora de Traballadores/as de Normalización da Lingua (CTNL) e a Deputación da Coruña, organizan a sétima edición do curso de verán sobre dinamización lingüística, que ten lugar no Pazo da Cultura de Carballo os días 20, 21 e 22 de xullo e que se centra na análise dos discursos para o fomento da lingua galega.
Na inauguración, que ten lugar o mércores 20 ás 10.15 h, participarán o presidente da CTNL, Nel Vidal; a directora do Servizo de Normalización Lingüística da UDC, Goretti Sanmartín; o secretario xeral da Universidade da Coruña, Carlos Amoedo, e o concelleiro de Normalización Lingüística de Carballo, Xosé Regueira.
Os obxectivos deste curso son reflexionar sobre a incidencia do(s) discurso(s) na situación social da lingua, analizar os argumentos a respecto da diversidade lingüística, revisar termos e conceptos sociolingüísticos en transformación e avaliar as ideas forza e os conceptos chave do discurso normalizador sobre o galego, así como a súa actualidade e/ou necesidade de reformulación.
Análises, grupos de traballo, obradoiros e actividades lúdicas
O curso comezará cun relatorio de José María Sánchez Carrión, “Txepetx”, sociolingüista vasco, no que presentará propostas de discursos e argumentos integradores para a normalización lingüística. A continuación, a profesora da Universidade da Coruña Pilar García Negro falará sobre a dignificación das palabras que nos pertencen, como é o caso do termo “normalización”. Pola tarde, o técnico de normalización Iván Méndez fará unha panorámica sobre os marcos e discursos sobre a lingua, e pecharase o día con grupos de traballo sobre a construción de discursos para a promoción da lingua.
O segundo día de curso, o xoves 21, comezará cun relatorio de Celso Álvarez Cáccamo, profesor da Universidade da Coruña, co título “Para a hexemonía social do galego: discursos, prácticas e políticas lingüísticas”. A continuación traballarase en grupos sobre a construción do discurso e, xa pola tarde, o sociólogo Fermín Bouza, da Universidade Complutense de Madrid, falará sobre marcos ideolóxicos, estrutura social e lingua na sociedade galega actual. A continuación, a psicóloga valenciana Gemma Sanginés (autora da exitosa guía catalá Sortir de l’armari lingüistic) fará un obradoiro de espazo lingüístico individual, que será simultáneo a outro do profesor Valentim R. Fagim sobre o coñecemento e a importancia do portugués.
Pelos na lingua
O día rematará coa representación de Pelos na lingua, de Talía Teatro, obra teatral de grande éxito sobre a realidade lingüística e que foi estreada no mes de febreiro en Carballo. A esta representación pode asistir o público que o desexe, con entrada libre e gratuíta, sen necesidade de reserva. Será o xoves 21 ás 21.00 h no Auditorio do Pazo da Cultura.
O último día do curso, o venres 22, a psicóloga valenciana Gemma Sanginés repetirá o obradoiro de espazo lingüístico individual, que será simultáneo a outro de Manuel Núñez Singala, escritor e director de normalización da Universidade de Santiago de Compostela, sobre os prexuízos lingüísticos. A continuación leranse as conclusións xerais dos grupos de traballo e da conferencia de clausura encargarase o presidente da Coordinadora de Traballadores/as de Normalización da Lingua (CTNL) e técnico de normalización do Concello de Carballo, Nel Vidal, que falará sobre unha posíbel guía de estilo para a política lingüística.
